Ruralidades e turismo gastronômico no município de Silveira Martins, RS, Brasil

Resumo

No debate académico o rural e o urbano ocupan hoxe un espazo relevante. Ao mesmo tempo, faise patente un investimento dos valores relativos a estes dous espazos, sobre todo coa procura dunha vida máis sa e o contacto coa natureza, á que se asocia a revalorización do rural. Así, o espazo rural, antes visto soamente como un ámbito de produción agropecuaria, é hoxe utilizado como zona de recreo e lugar de residencia.De feito, é a través de actividades de lecer e esparexemento nas áreas rurais como hoxe podemos calibrar a crecente demanda da tradición e o endóxeno. Como indica Wandeley (2001), agora a sociedade brasileira reforza a súa mirada sobre o rural, antes visto como unha fonte de problemas, e hoxe como un potencial de “solucións”. A procura dos hábitos e elementos da vida no campo reflíctese na concomitante demanda de actividade turística en áreas rurais. Dentro dos tipos de turismo nesas áreas,destacamos aquí o agroturismo, porque se trata da modalidade que máis enfoca as ruralidades locais e propicia que o visitante viva e experimente a vida rural. Desde esa perspectiva, buscouse analizar a matriz conformadora do “rural tradicional” e a súa revalorización como produto turístico nos pequenos municipios do interior de Brasil. O estudo de caso proposto céntrase no municipio de Silveira Martins, localizado na parte central do estado de Rio Grande do Sul ( RS). Este municipio conta cunha ruta gastronómica que presenta elementos que dan a coñecer aos visitantes as tradicións e os atavismos da inmigración italiana que se estableceu na rexión ao longo do século XIX. A análise do estudo levado a cabo no municipio de Silveira Martins - RS- está baseado en datos obtidos a través de entrevistas e cuestionarios non estruturados aplicados no lugar,así como na observación participante durante as visitas ao municipio e a análise de material turístico publicitario.