O Anuario da Facultade de Dereito da Universidade da Coruña é unha revista científica de referencia no ámbito xurídico, orientada á difusión de traballos orixinais de investigación que contribúen ao avance do coñecemento nas distintas ramas do Dereito.
Cunha traxectoria consolidada no contexto académico, o Anuario caracterízase polo rigor das súas publicacións e pola calidade das contribucións que acolle, configurándose como un espazo aberto á pluralidade de enfoques doutrinais. Nas súas páxinas teñen cabida tanto o estudo das institucións xurídicas clásicas como a análise dos desafíos contemporáneos do ordenamento, desde perspectivas normativas, xurisprudenciais, comparadas e interdisciplinares.
A revista configúrase como un foro de reflexión crítica e de innovación académica, comprometido co desenvolvemento do pensamento xurídico e coa proxección internacional da investigación. A súa orientación ao acceso aberto reforza a difusión do coñecemento científico e favorece o intercambio de ideas entre a comunidade académica e os profesionais do Dereito.
A publicación ten periodicidade anual e, desde 2016, edítase exclusivamente en formato electrónico. A súa estrutura articúlase en catro seccións —artigos doutrinais, comentarios de xurisprudencia, recensións e notas, e unha sección dedicada á innovación docente— orientada a promover a reflexión sobre metodoloxías e boas prácticas no ensino xurídico. O Anuario atópase indexado en bases de datos recoñecidas como Latindex 2.0, Dialnet, Dulcinea e RESH, e conta cunha clasificación académica de Grupo B nos sistemas CIRC e CARHUS+. Baixo a dirección da profesora Noelia Collado Rodríguez e coa secretaría editorial a cargo da profesora Silvia Rodríguez López, a revista mantén aberta de forma permanente a recepción de orixinais, co obxectivo de garantir a axilidade dos procesos editoriais e a redución dos prazos de publicación.
